يوميات زوجة محڨورة(مذلولة) - نجمة بن طالبي

يوميات زوجة محڨورة(مذلولة)

الجزء الأول

براهيم : الدار حالتها حالة واش بيك ( مابك ) اليوم..كل يوم فيلم راسي وجعني مولاتش(لم تعد) حياة هذي رشي معطر جو واش(ما) هذ الريحة

أمينة: والله البيت منظم ويشعل شعيل التخراب معشعش في رأسك وساكن فيه..رشيت والريحة تنفنف(مالية الجو) روح داوي روحك لانك فقدت حاسة الشم

براهيم: والله نروح نعيط لباباك يشوف الهدية لي هداهالي واش عاملة فيا..بصح لانه مريض ماعليا غير نصبر

أمينة: هههه أنت هكا ديما تسبب وتحوس منين تعقب(من أين تمر)...فارغ شغل ...وحاططني في راسك ..عيط(نادي) للناس أكل أصلاًحافظينك وعارفين شحال(كم) راني مرا(إمرأة) حرّة وداري (بيتي)تشعل شعيل

براهيم : داري تشعل شعيل....
دايما تقولي تشعل حتى حرقتيني واش هذ النيو لوك لي دايراه هذا ماخصك غير الشعر الأحمر وطبخ طبخ تقول راني في سميرة tv أرحميني أخاه

أمينة: أتحرق ولا أتفلڨ..أنا مليت منك ومن تفاهاتك..لازم تبوس(تُقَبِل) راسي ليل ونهار وتحمد ربي أني متحملَ لهْبَال تاعك..نحط أحمر ولا أصفر موش شغل أنا شابة طبيعي ومنسحقش نسڨم
( أزيـن) روحي(نفسي)...عندك الحق حياتي أكل وانا نطيّب(أطبخ) وكان غير عاجب تاكلو الرهج(السم)

خربشات بالعامية ل..نجمة بن طالبي
يوميات زوجة محڨورة
الجزء الثاني

إبراهيم :اليوم لاڨاتو(حلويات) لاوالو (ولاشيء)قاعدة غير تخيطي هذا ماتعرفي مولات(صاحبة) الجبة (الفستان )دكا (الآن) تجي كل همك الزبونات وانا وراني قدامهم(أين أنا أمامهم)!!؟

أمينة: تحوس عالڨاتو ياك تاع المرة لي فاتت(المرة الماضية) معجبكش (لم يعجبك)وحلفت والله منزيد ندير(نعمل) حاجة هاهو لحانوت(المحل) والخياطة هي لي راهي(هي التي) مْنسْيتني همك وهم ولادك...نلهي(أشغِلُ) روحي بيها باه(لكي) منفكرش(لاأفكر) بزاف(كثيرا)

إبراهيم : لولاد يلعبوا طول النهار برّى( بالشارع )
والبنت عند صاحبتها
ومولات الجبه جايه فالطريق
والمدارس بعد غدوا
ودِّي (خذ ْ)لولاد للمسيد (المدرسة )وجيبهم وحاله ما يعلم بها غير ربي (الا الله)

أمينة: يلعبو لاه ميلعبوش لولاد أكل راهم برا(كلهم فالخارج)..عالأقل نتهنالهم شوي نهار طول مهبليني..تديهم وترجعهم نورمال(عادي) ولا تحوس (أوتريد)أنا نخرج نخدم فالدار ونزيد برَّا(الخارج) لراسي هذي جديدة هذي

إبراهيم: لالا لاه(لماذا) تخرجي أقعدي فالدار خيطي وكونكتي( مع النت) واهدري (تكلمي)مع خواتاتك صحاباتك وهذي رسات (وصفة) وهذا ماسْك للوجه
( قناع) وفلانة تزوجت ولخرى تطلقت ووو

أمينة: حبـّسْ حبّسْ(توقف) وقتاش (متى) تكلمت شوي هدْرِة وبخلتيني بيها حتى ولينا منحكيو منتلاقاو والنت هو الي رجعني نخيط وبسبتو(بسببه) ننسى المشاكل نتاوعي كان راني هبلت والسلام...
يوميات زوجة محڨورة

الجزء الأخير

أمينة: ألو حلومة عيطتي(اتصلت) في وقتك والله راني مقلقة بزاف..برهوم هبلني الصباح وانا عييت(تعبت) من عقليتو هذي غير لعياط والنقد نهار طول

حليمة: الله يهديه ويهديك..هذا راجلك(زوجك) ميمي ولازم تتحمليه وتكوني ستر وغطاء عليه..شوفيني انا ملي راح الغالي الدار فرغت والركايز(الركائز) طاحو..كان غير يرجع يعيط ويدير واش يحب نحطو فوق راسي والله..تشفاي أمينة كان كل يوم يتبعك عند الخياطة وميروحش حتى يشوفك دخلتي للدار وميقولك ولا كلمة وجا طول خطبك..راجل صح

أمينة: انت ديما هكا تحامي(تدافعي ) عليه بصح بيني وبينك المسؤولية كبيرة والمصروف بزاف عليه عليها قلت نخيط ونكون سند ليه..برك كان يبركا(يتوقف) لعياط(الصراخ) والنقد الي ساكن فيه
اي شفيت والناس اكل حسدوني على حبه لكبير ليا
عين وطرطقت( أصابتنا عين)

حليمة: تعرفي ميمي لازم تتفكري أيام زمان وهذاك الحب الي كان بينك وبينو وكيفاش وقف معاك في مرضك وكيفاش كان يبكي وانت بعيدة عليه..هو ثاني تعب بزاف ولازم انت تواسيه وتكوني الصدر لحنين موش تزيدي تزيري (تقسي) عليه

أمينة: عمري كنت قاسية وانت عارفة..برك (فقط) منحبش كي يعاير( ينقد) وانا نهار طول نقتل في روحي علاجالو( من اجله) وعلاجال ولادو

حليمة: منعرف شكون راه يطبط( يدق الباب) انت خمي في كلامي واتفكري شحال (كم)راهو يحبك وعمرو مخْزِر(لم ينظر) لمرا( إمرأة) اخرى..يلا ّسلام

أمينة تفكر في كلام حليمة ولقات (ووجدت) انه مهمها كان فابراهيم هو سندها زوجها وحبيبها ولازم تحاول تصحح الوضع الي عايشينو وتمتص غضبه وتوفرله وقت خاص بيه ويتكلمو ويخرجو كي زمان..بينما امينة تحاور ضميرها دق الباب فتحته فكان ابراهيم

ابراهيم: واش لخبار لولاد روحو (دخلو)ولا مزال

أمينة : لامزال الحال خليهم يزيدو شوي قلي راسك تنحلك راح السطر

إبراهيم: خيرمن البارح واش اليوم راكي شابة!؟؟

أمينة : أنا أصلا شابة(جميلة) وكل يوم انت برك لي متشوفنيش(لاتراني)

إبراهيم : اليوم تلاقيت سعيد تتخيلي طلق مرتو يالطيف واش كان يحبها وسمح فيها غاضوني برك لولاد

أمينة : متقوليش الله أكبر شفت الراس اليابس واش يدير ديما نقوللها بالشوي عليه..تخاف حنا نتبعوهم بلهبال تاعنا هذا

إبراهيم: بعيد الشر حنا ميفرقناش غير الموت ..قالي واحد تلاقيتو فصلاة الجمعة...واليوم الدرس على زوجات الرسول وقال انه آخر وصية للرسول كانت : "استوصوا بالنساء خيرا" والله يا أمينة الدرس هذا ورالي قيمتك عندي وانا عمري نفرط فيك ..وينعل بو الشيطان لي دخل بيناتنا..استغفر الله يا ربي قررت ماليوم لا عياط لاوالو..

أمينة : يويويوي..أخيرا هداك ربي وربي يهديني معاك...المهاوشات
(الخصامات) تاوعنا مدارو والو غير اثرو علولاد لكبير ولا غير يغيب مالدار كره مالحس ..لازم نسڨمو رواحنا ونتواعدو لاعياط لاحس...ونرجعو كي زمان كلامنا غير بلعقل لي يتقال ونبعدو عالقيل والقال...هكا نرجعو كي زمان ويسكن دارنا الحب والأمان

وصية لكل زوج :
لاتبحث عن الحب خارج بيتك فهو داخله..ولا تنقد زوجتك وتهينها فهي سندك هي التي ستدوم لك ..أسترها تسترك..احترمها ستحترمك..قدرها ستقدرك..ولاترهقها بالمقارنات..تلك أجمل وتلك اشطر..فكلما اتسعت عيناك للخارج..
ضاقت في الداخل

أماوصيتي للزوجة فأقول :
مهما كبرت المشاكل في الأخیر یجب أن تنتصر ٱصرة الحب علی جمیع المعوقات..ووالله الزوج المحب بمثابة الأب والأم وكافة الأقرباء.. إذن لتكوني سعیدة علیك ان تراجعي حساباتك من اول وجديد وشوفي اين قصرتي ...صححي وناقشي وبلطف لا بعصبية وقلة ادب

هكا ستنتشر السعادة في كل بيت..وسترسم الابتسامة في كل الوجوه

خربشات بالعامية ل. نجمة بن طالبي

» رسالة حب - نجمة بن طالبي
» من هم الأمازيغ؟!! نجمة بن طالبي
» أمازيغية وأفتخر...نجمة بن طالبي