Hitskin.com

مولد سيدنا السيسى (أبو حصيره)
17 May 2014

كوميديا سوداء
مولد سيدنا السيسى (أبو حصيره)

ماذا قال حواريى السيسى عن حملته وبرنامجه الأنتخابى

سيف اليزال :
السيسى لا يحتاج لجولات أنتخابيه

أحمد موسى :
لن يكون للسيسى حمله أنتخابيه

عمرو أديب :
البرنامج موجود خلاص ... ومش برنامج واحد ... برنامجين

وقال مصطفى بكرى :
السيسى لديه مشروع أختصره فى كلمه بسيطه ... عايزين مصر تبقى قد الدنيا

وقالت حملة السيسى
لن يكون هناك برنامج أنتخابى للسيسى لأن الوقت المتبقى لايكفى لفتح حوار حوله ربما يثير لغط كثير لا داعى له

وقال آخرون :
السيسى مقيم النهضه القادمه ...
مصر على أبواب نهضه حقيقيه تعيدنا ألى عصر محمد على ...
وأنه مقيم النهضه الرابعه ...

ولما لا وقد أرسله الله رحمة للمصريين ومعجزة للعالمين لم ولن تتكرر
فلتقرأوا معى أدلة أعجاز السيسى

يقول سعد الدين الهلالى :
كما قيد الله لمصر رجلان ... موسى وهارون ... قيد لها اليوم أيضا رجلان ... السيسى ومحمد أبراهيم

وكما فتن يوسف أمرأة عزيز مصر والنساء من حولها فأن الله قد أرسل لنا فاتنا جديدا للنساء هو سيدنا السيسى ... ولما لا وقد فتن به الرجال أيضا كما قال القمص عويضه عن نفسه ... فالسيسى أمور وللنساء الحق فى أن يفتتنا به

فالسيسى فوق البشر ومش أنسان أصلا ... وملاك بعثه ربنا فى صورة أنسان تماما كما المسيح وكما تقول أمانى السيد سعيد

فليس غريبا اذن أن يكون بعثا جديدا لجمال عبد الناصر بطل الأمه العربيه بل أعظم منه

أنه صلاح الدين الايوبى قاهر الصليبيين يبعث من جديد ولكن فى مرتبة أرقى

بل أنه محمد على باعث النهضه المصريه الحديثه من جديد

(راجع المصادر والوصلات التى تشير ألى ماسبق فى مقال "البحر غضبان مابيضحكش")

أنه السيسى (أبو حصيره) الخليط السحرى الذى أعده طباخى الأعلام المصرى الأنقلابى ليكون المنه الألهيه والمعجزه الكونيه التى لم تتكرر منذ بدء الخليقه فهو يجمع فى شخص واحد مابين الأنبياء والآلهه والعظماء والقاده والحكماء عبر القرون والعصور

نهايته ... هو السيسى بتاع كله ... وزى المصريين مابنوا الأهرامات وسخنوا الشمس وبعدين لبسوها النظاره لحد ما يدهنوا الهوا دوكو ... برضه همه دول المصريين اللى عملوا خلطة السيسى السحريه رغم أنف العالم الحاقد كله على مصر والمصريين ... وزى ماقال سيدنا ومولانا السيسى أبو حصيره

بكره تشوفوا مصر
مصر أم الدنيا وهتبقى قد الدنيا

محدش يسألنى أزاى
· وأحنا غرقانين فى الديون جوه وبره وقربنا نعلن أفلاسنا

· والبطاله حشى وسط أكتر من ربع الشباب

· والمرض ضارب وسارح فى ناسها الطيبيين من الكبد الوبائى على السرطانات على الفشل الكلوى ده غير السكر والضغط والقلب والكلسترول والخلل النفسى والعقلى

· وحد الفقر اللى غطس أكتر من نصف الشعب تحته

· والبنيه المنهاره من مواصلات وسكك حديد وطرق وخدمات ونظافه وجهاز حكومى بيروقراطى فاشل وفاسد ومترنح وعاجز عن أداء أى شئ إلا مقاومة تغييره

· والفوضى الأمنيه وسيادة قانون البلطجه على كل المستويات بدء من الدوله وأجهزتها الأمنيه والقضائيه ووصولا ألى بلطجية الشوارع والأزقه والأحياء الذين يحكمون بأسم الشرطه وكذلك تجار المخدرات والعاهرات الذين يقومون بدورهم الوطنى فى حماية النظام

· هذا بالأضافه ألى أنتشار الجهل والأميه وتدنى مستو التعليم والمهارات الفنيه

· ومش هتكلم عن مافيا وعصابات الفساد المتغلغله فى كل مفاصل المجتمع والمدعومه من السلطه وأجهزة الدوله العميقه

· ناهيك طبعا عن الكلام الفارغ والدلع بتاع المثأفين عن مناخ الحريات وحقوق الأنسان والممارسات الديمقراطيه اللى ماتأكلش عيش اليومين دول واللى بيشتغلوا لنا بيها الخونه والعملاء اللى مش عايزين الخير لمصر

ماتسألنيش أزاى هتبقى مصر أم الدنيا ... قد الدنيا

فهذا الرجل الأله الأسطوره المعجزه السيسى أبو حصيره الذى لم يتجلى مثله أحد منذ بدء الخليقه هو بالتأكيد قادر طبعا على كل شئ وعلى صناعة المعجزات الثانويه من تحت عباءته وهو طبعا يعرف مالانعرف فما علينا إلا أن نسلم له سفينتنا وأرادتنا وستاتنا وشبابنا وما علينا إلا السمع والطاعه فهو المعجزه الأكبر الذى بعث الله بها ألينا ليثبت للعالم الحاقد كله أن المصريين همه أجناد الأرض وبالمره خير أمة أخرجت للناس وبالمره كمان شعب الله المختار (مفيش مشكله) ولذلك لم يكن غريبا أن يحقد علينا العالم كله فهذا هو قدرنا وهذا هو دائما قدر العظماء المصريين المصطفين

فسيدنا السيسى أبو حصيره قال
أنتوا ماتعرفوش أن أنتم نور عنينا وللا أيه

وهو برضه اللى قال
أحنا نموت الأول بس أنتوا ماتتألموش

ومن جماله وتضحيته بنفسه من أجل شعبه كما فعل المسيح يقول
شرف حماية الناس عنده شخصيا أهم عنده وأعظم من شرف حكم مصر

صحيح هو دلوقتى جاى علشان يحكم مصر بس ده علشان أحنا عايزينوه يحكم مصر لكن لو جيت للحق هو مش عايز بس مايقدرش يخذل شعبه اللى بيحبه واللى طلب منه كده ... مش كده وللا أيه

وسيدنا السيسى أبو حصيره
مابيحبش الواسطه ولا يطيقها

بس معلهش ماحدش يمسك على الوحده وييجى فى الهايفه ويتصدر ويقول أن ولاده الأتنين بيشغلوا مناصب مهمه فى أهم الأجهزه السياديه فى الدوله (المخابرات العامه والرقابه الاداريه) فهذه نقره وتلك أخرى

ولما سيدنا السيسى أبو حصيره يقول للستات
عايزكم تنزلوا الشارع ... تخدوا ولادكم ورجلتكم وتنزلوا الشارع

ده مش معناه أنه محتاج لمساعدة حد ده حكمه منه علشان الناس تحس أنها شريكه معاه فى بناء الحضاره المصريه الحديثه التى بعث من أجلها

وده طبعا بيفسر هو ليه رجع يطلب منها تنزلوه الشارع تانى

طبعا علشان يشارك الناس وبالذات الستات و ال... ويخليهم يحسوا بالمسئوليه وأهمية اللى بيعمله علشانهم واللى بيحصل فى مصر دلوقتى من أعجاز لا يقدر عليه إلا سيدنا السيسى

وعلشان كده حملته الأنتخابيه ديه تحصيل حاصل بس علشان الناس تحس أنه واحد منها لا أكتر ولا أقل وعلشان كده قال
أنا أصل حملتى الأنتخابيه مش هتكون تقليديه

ولما ناس أغبيه زى حالاتى كفروا وطلعوا يتفزلكوا ويسألوا ليه هو مش هيبقى رئيس ولازم نعرف هوه هيعمل أيه علشان يحل المشاكل المتلتله ديه ويخلى مصر قد الدنيا زى مابيقول رد علينا رد مفحم وحارق وقال
عايزين وللا مش عايزين

بس الغريبه أنه رجع يقول
أن مفيش معاه عصا سحريه ...

طب ماشى وهو محتاج عصا سحريه فى أيه ... ده هو السحر نفسه والمعجزه المتفرده وحده زى ماقالت أمانى الخياط وضيفتها على قناة أون تى فى ... يبقى قصده أيه بالكلام ده

الكلام ده يقلق ويخلى الواحد مخه يودى ويجيب وأظاهر هيوصله لحد الكفر بالسيسى ... كلام فى سرك أنا بدأت اشك فيه وبدأت أفكر أنه والعياذ بالله نصاب ودجال وحلنجى ودخل على الشعب الطيب ده بالأوطنه والدمعتين بتوعه والسهوكه والحسوكه والسهتنه وتسبيل العينين وتنعيم الصوت علشان هدفين أتنين بس مفيش غيرهم الأول شخصى وهو أنه يحقق حلمه الذى ظل يطارد طموحه فى أن يكون رئيس مصر والثانى هو أن يسدى الجميل ويسدد ماعليه للى ساعدوه وتبنوه ووصلوه لتحقيق حلمه واللى قال عليهم لرئيس تحرير المصرى اليوم فى جلسته الخاصه معه على هامش الحديث اللى أجراه معاه وقال له بالحرف الواحد
أنهم قالوا له أن أحنا هنديك اللى ماأدنهوش لحد تانى من قبلك

بس ياترى كان بيقصد مين بالكلام ده ... الله أعلم ...
لكن حكاية النجمه الكبيره اللى أتكلم عليها برضه فى نفس القعده أياها واللى لقاها مرسومه على ساعته الأوميجا يمكن تدينا فكره

بس هوه ماوضحش أكتر من كده وقالنا هى نجمه شكلها أيه ... ياترى سداسيه مثلا زى اللى فى علم أسرائيل وللا خماسيه زى اللى كانت على كتف الجاكت اللى لبسوه ليه فى روسيا لما راح يسلم عليهم هناك

وبمناسبة الساعه الأوميجا تعرفوا تمن الساعه ديه كام؟ أنا شخصيا مش عارف بس سمعت ناس بتقول أن تمنها يعدى 50 ألف جنيه بس أنا مش مصدق

وبصراحه كده اللى خلانى أشك فيه أكتر وأفكر فى أنه يمكن يكون نصاب كبير وأنه مش هيعمل للناس أى حاجه بعد مايوصل للى هوه عايزه ويقعد على كرسى الرئاسه هو اللى قاله فى الأيام الأخيره

مش بس أنه مامعهوش عصايا سحريه ولكن قال كمان

o نقسم الرغيف على أربعه

o ونستعمل لمبات موفره

o وننزل الشغل بادرى على الساعه سته الصبح علشان نخف من الزحمه

o ونروح الشغل مشى علشان نوفر ونخفف على المواصلات

o ونحل مشكلة البطاله بتشغيل الشباب على عربيات الخضار
اللى بتفكرنى بالمشاريع الخلاقه لوزيرة القوى العامله أيام مبارك اللى جابت كم ألف فرصة عمل فى السعويه بس كانت للخادمات فى بيوت السعوديين بدل الفلبينيات ورغم كده محلتش مشكلة البطاله

مش بس كده ... ده لما الجدع المذيع التخين سأله على الهوا عن الجيش ومناقشة ميزانيته وميزانية الأمبراطوريه الأقتصاديه للجيش (اللى بالمناسبه بيقولوا أنها أكتر من 40% من أقتصاد مصر) أتنرفز وقال

سيبوا الجيش فى حاله

رغم أن مهمة الجيش الوطنيه والمقدسه والوحيده والتى يجب أن يتفرغ لها بالكامل هى حماية أمن وحدود الوطن من أى أعتداء خارجى ويجب ألا يشغله عن هذه المهمه أى شئ آخر مثل تشييد وأدارة أمبراطوريه أقتصاديه تصبح سبوبه لكبار جنرالات الجيش الذين يتحولون لرأسماليين عسكريين لهم مصالحهم الأقتصاديه التى يتفرغون لها ويدافعون عنها لتتحول هذه الأمبراطوريه مع الوقت ألى أخطابوط فساد يدمر كل من يقف أمامه من منافسين مدنيين لا يفهمون قواعد اللعبه ولا يعرفون حدودهم ولا يدفعون أتاوات قبولهم من الباطن فى المشاريع الأقتصاديه التى تطرحها الدوله والتى من شأنها أن تنشط الأقتصاد الوطنى

ورغم أن ميزانيات وكشوف حساب هذه الأمبراطوريه الأقتصاديه (بغض النظر عن كل مخاطرها وسلبياتها) من المفترض أنها لا تدخل ضمن المصاريف السريه للجيش وتسليحه وتدريبه إلا أنها تظل ميزانيات سريه لا تعرف الدوله عنها شئ ولا يسدد الجيش عن أرباحها ضرائب لخزينة الدوله التى تدفع منها رواتب الموظفين وتقدم بها الخدمات الأساسيه للجماهير رغم أستغلال الجيش للمجندين لديه فى تشغيل هذه الأمبراطوريه الأقتصاديه بدون رواتب وكأنهم عبيد أو عمال سخره

مش بس كده ... لأ وكمان ...

دلوقتى مبقاش ينفع النزول للشارع ... قال أيه ... علشان المظاهرات هتعطل الأقتصاد والأستثمار

أمال لما كنت بتقول للناس والستات بالذات تنزلك الشارع مره وأتنين ماكنش ده بيعطل الأقتصاد والأستثمار ... ولما عزلت رئيس منتخب ... معطلش ده الأستثمار ... ولما نزل الجيش الشارع وقتل فوق عن 300 فى يوم واحد ... مافزعش ده الأستثمار والأقتصاد ... ولما طاردت الصحفيين وأعتقلتهم لمنعهم من تغطية الأحداث فى مصر ... ماعطلش ده الأقتصاد ... ولما أصبح قضاءك مسخه ومسخره أمام العالم كله وفقد أحترامه ومصدقيته ... مهربش ده الأستثمارات وضرب الأقتصاد ... وللا هى حلوه ليك وكخه لغيرك ... وللا هى مصر عزبة أبوك

مش بس كده ... ده طلع مربط مع الأمريكان على الأنقلاب ... ولو مش مصدقين أرجعوا أسمعوا اللى قاله مع برهومه ولموسه حبايبه عن حديثه مع رئيس الأركان الأمريكا قبل الأنقلاب لما كان بيسألوه

هتعملوا أيه

ودلوقتى بيقول لهم على الهوا أنه جاهز يلعب دور الشرطى الأمريكى فى المنطقه وممكن يدخل ليبيا علشان يطهرها من الأرهاب (الأسلامى طبعا) وممكن كمان يغزو الجزائر فى تلات أيام برضه علشان خاطر عيون الصهاينه والأمريكان ومش مهم بعد كده أم الشعب المصرى اللى هيغرق فى جحيم حروب ومشاكل لا لزوم لها مع جيرانه وأخوانه العرب

مش بس كده ... ده طلع البطل القومى لأسرائيل مش بس الكنز الأستراتيجى اللى حاز لقبه العميل مبارك ... وعايز تتأكد أرجع وأسمع هو قال أيه لبرهومه ولموسه حبايبه لما سألوه عن التطبيع مع أسرائيل ... قال أيه

همه بس يقدموا أى حاجه كده علشان الدنيا تتحرك

ولو مش مصدق أرجع للوصلات اللى فى المقاله ديه
السيسى هو البطل القومى الجديد لأسرائيل والأسرائليين

ولو برضه مش مصدق أستمع لما قاله مؤخرا الفضحى "أيهود باراك" أمام معهد واشنطن لسياسات الشرق الأدنى
https://www.youtube.com/watch?feature=player_embedded&v=VgNcEgd2dP0

بس المصيبه ... أنه بعد ده كله ... طلع مكشوف ومخوخ والناس بره مش مستعده تتورط معاه تانى

فالأتحاد الأوروبى يعلن تراجعه عن مراقبة الأنتخابات الرئاسيه فى مصر لغياب ضمانات نزاهة الأنتخابات !!

ولسه ...

لما يلغى الدعم

برضه زى مالمح مع برهومه ولموسه حبايبه

ولسه ...
لما يفرج عن مبارك وعياله ويرد لهم أعتبارهم

ولسه ...
لما يوزع الكام شقه اللى حنس بيها الشباب الغلبان على صبيانه وبلطجيته وبطانته الجديده رشاوى ومكافأت لخدماتهم وولائهم له كما سبقه ألى نفس الأسلوب جمال أبن مبارك لما عمل جمعية شباب المستقبل ويبقى يقعد الغلابه الحالمين بعد كده يقشروا بصل

ولسه ...
لما يصدق على أحكام الأعدام اللى بقت بالزوفه وبالقفه واللى بتتجهز له وفى أنتظار تصديقه لما يقعد على كرسى الرئاسه

وزى ماهو قال
هو عارف بيعمل أيه

الدور والباقى على ...
الناس فى مصر اللى مش عارفه هى عايزه أيه ... ولو عارفه ... مش عارفه أزاى ممكن توصلله ... ومش عارفه هى رايحه فين ... وللأسف عاملين زى القطيع المذعور اللى خوفه من الثوره وتمنها خلاه يجرى على الصياد السفاح وسكينة الجزار ويقول له ... أدبحنى وريحنى ... ياسيدى أحنا آسفين ... فعلا شر البليه مايضحك ... ولسه لما تكمل بقيت فصول المسرحيه الهزليه المأساويه

النهايه

» للنساء فقط - محمد بن يوسف الزيادي
» سيدنا يوسف عليه السلام
» درس من دروس سيدنا ابراهيم سلام الله عليه

Hitskin.com

مولد سيدنا السيسى (أبو حصيره) - وكما فتن يوسف أمرأة عزيز مصر والنساء من حولها فأن الله قد أرسل لنا فاتنا جديدا للنساء هو سيدنا السيسى