أنا تعبانة - نايا توفيق

موضوع: أنا تعبانة - نايا توفيق 2019-07-09, 7:22 pm

أنا تعباااانة...
تعبانة من حال الناس الماشية بالشارع بتحكي مع حالها ...تعبانة لأني صرخت بوجه طفل كان عم يقلي خالة اشتري مني علبة شوكولا..لأني والله كنت تعبانة..ومن كتر ما كنت مقهورة عليه صرخت بوجهه.. ورجعت و بسته ..ودمعت
تعبانة من الشب اللي بيجيك على جنب بيحكيلك بالله تعطيني أجار الطريق لو معك لأنو مصاريي وقعوا مني ..هو ما وقع منه شي ..بس مو قادر يحكيلي والله ما معي آكل..لسا في شوية كرامة منعتو من هالكلمة..تعبانة من الشوفير اللي عمره فوق 60 سنة .. وبيشتغل طول اليوم على السيارة وبيمسح عرقه بالمنشفة ويمكن مش عرق يمكن دموع ..وركبته بتوجعه..تعبانة من رفقاتي اللي بيناموا للمغرب .. لأنو فقدوا الأمل بالحياة..وبيقلولك الانتحار حرام..فبينتحروا بطريقة حلال ..
تعبانة من حالتي اللي مش قدرانة تتأقلم مع أي شي بالحياة ..لك أنا اللي كنت بخلي الحجر يضحك..
تعبانة من معاملة الدول لأهل بلدي وكرامتهم المسفوحة عالحدود وبالملاجئ وبالخيم..تعبانة من منظر الشب اللي لما حدا بيقلوا ليش ما تزوجت.. بيبتسم هديك الابتسامة اللي بتقطع القلب وبيقول إن شاء الله قريب..وهو ما معو حق باكيت دخان
تعبانة من منظر البنت يلي بتكلف حالها باللبس والكلام وترتيب شكلها حتى تلفت نظر شب ويصير عريس.. لأنه المجتمع وأهلها ملوا منها..تعبانة من حالة ولاد بلدي اللي وصلولها...تعبت من منظرن وهن عم ينهشوا بلحم بعض وياكلوا بعض ويدوسوا عبعض
آخ يابلدي شوصار فيك وبولادك.......

» اسمر خفيف الروح غناء سميرة توفيق من كلمات والحان توفيق النمري .
» نايا بظل النخل أنتظر - يسرى هزاع
» هنا باقون - توفيق زياد