يا وطن كل مين إيدُو إِلُو - الشاعرة نهلة عنان بدور

الشاعرة نهلة عنان بدور

يا وطن كل مين إيدُو إِلُو
-------------------
يا وطن كل مين
إِيدُه إِلُو ..
الشعب طفران
والحكومة بتبَهْدِلُه

النَّاس تعبانة ..
من القهر وَجعَانِة
ما في حَدَا للتَّاني
لا النَّاس بقْيِتْ للناس
ولا الظلَّام عَم يسألوا
كل مين قاعِدْ عّم يغزُلْ
بِمَغْزَلُه ..

يا قلب يا موجوع ..
طَفِّي كل الشموع
كل شي عِنَّا ممنوع
وبهالأرض ما في
حَدَا إِلُو ..
لا باعْ ولا دراعْ
كل شي بوَطَنَّا ضاعْ
بالشبر عّم ينباعْ
ونِحْنَا ما إِلُو ..

شو عاد نتمنَّى
وطن ما في عِنَّا
لا رجوع عّم نستَنَّى
والحلم ما لُه سْطُوع
ولا عاد في شي
طَعْمُه حلو ..

يا وطن كل مين
إِيدُه إِلُو ..
الوطن بردان ما
في حَدَا من البرد
يحميه وِ يدَلِّلُو ..

يا أَمَلْ زْرَعْنَا ..
بِحقول الحَنِين ما
الْوَطَن ضَيَّعْنَا ..
ونحنا موجودين
ضاعِتْ مَطَارحْنَا
وسَبَقتنَا السِّنين
بالدَّم سَبَحْنَا ..
بالآهات و العَنين
يا رَبّ ترَيِّحْنَا ..
من العَيْش المُهينْ
أَمسينَا و أَصبَحْنَا
سَجَّان و سَجينْ
بالغُربة اندَبَحْنَا ..
وانسَنّ هالسكِّينْ
عشنا بهالغابة
خايفين مشَرَّدينْ
لا وطن يجمَعْنَا
ولا حارِس أمين
وبالجهل سايقينْ
لا هَوَا يعَيِّشنَا ..
عايشين بالتقنينْ
صرنا ببلدنا أَغْرابْ
وضايعينْ ..

كِنَّا بيومْ أُمِّة حدودنا
للصين ..
صار نهَارنَا عَتْمِة
جوعانين و بردانين
لا غَطَا يسترنَا ..
لا حَدَا يسأَل مين
هَي والله قصّتنَا
شَعْب المَحْرومينْ
فَقَدنَا عزّتنَا ..
وبقينا منسيّينْ
لِلرَّب اشتَكينَا ..
قولوا معي آمين ..

» يدور الزمن - الشاعرة نهلة عنان بدور
» شغف قاتل - نهلة ابو العز
» ( لن أعترف ) - سمر غازي مصطفى بدور