صبرت سنين وانا نمني في روحي - بقلم هاجر وشتاتي

صبرت سنين وانا نمني في روحي
اما ڤداش باش نصبر
ڤداش باش نعدي
ڤداش مني
ڤداش منك...و ڤداشً مني
ڤداش منك ضلمة
و ڤداش يحبلي باش توفى الحلمة...
ڤداش منك وجيعة
و ڤداش مني صبر و تلييعة
ڤداش منك مازال
و ڤداش مني وسع البال
و ڤداش مني...
ڤد السماء و ڤد البحور و الوطاء
ڤد غزارة نو في نهار شتاء
ڤد الي مايوفاش...
كيف غزرة متتحكاش...
تبسيمة لابدة متتراش...
كلمة وقت الغصرة متتلڤاش...
و ڤداش مني...
باش نهرب منك و ننسى همي
ڤداش مني...
باش نستنى تعبرني و تسألني على حالي...
ڤداش مني...و في روحي نمني...
و حرام فيك التنهيدة
ڤداش مني...
أنا لخذيت من النسيان تعويذة...
و حرمت على شفايفي التبسيمة...
ڤداش مني...باش تاخذ كلي...
و ڤداش منك...و ڤداش مني
ڤداش منك...
و من حروفك المعسولة...
ڤداش منك و من ملامحك
الي حافرة في الڤلب صورة
ڤداش منك...بعيد...سراب ...
و ڤداش منك...باش تكون لڤلبي ضميد
و ڤداش منك...
و ڤداش مني
و ياسوايع من عمري مخطوفه...
قداش مني...باش يجي نهار و نشوف حروفه...
و يا جمرة على أكتافي محطوطه...
قداش مني...باش تحرڤني كفوفه...
و ڤداش منك...
بقلمي هاجر وشتاتي

» صوت قلبي - بقلم هاجر وشتاتي
» عشت حياتي - بقلم هاجر وشتاتي
» عندما أهرب من كل شئ وأشتاقك - بقلم هاجر وشتاتي