"اي أنثى يجب أن أكون؟"

موضوع: "اي أنثى يجب أن أكون؟" 2015-12-27, 9:12 pm

"اي أنثى يجب أن أكون؟"
(منقول)
نبدا بالمخلوقة اللي بدعاية جالكسي اللي وزنها 40-45 كيلو وبتقولك "حينما تعشق الشوكولاتة"..
مع انك مو صادقة ! لأنك لو بتعشقي الشوكولاتة عنجد اكيد ما حيكون هيك منظرك !
بس الفكرة انها تدعو لعشق الشوكولاتة.. وكأنثى ودماغ باطن وهيك قصص رح نطلب من الدماغ يخزن هالمعلومة لوقت ما نروح Carrefour و نتمشى بين ممراته..
بعدين بتطلع المخلوقة تبعت دجاج (اليوم).. و بتكون بالدعاية كل يوم بتطبخ طبخات عربية واجنبية وبتنزل صورها عالفيسبوك لأسرة اجمل..
بعدها بتيجي بنوتة غاية في الجمال بتعمل دعاية ل Pampers بتكون بتغير ال diaper لابنها او بنتها وهي بتضحك معاه وبتغنيله، شي في غاية السعادة و الروقان.. لأنه فعلا تربية الأبناء من احلى المشاعر الموهوبة من الله لكن الفكرة كيف شكلها و كمية السيليكون اللي بوجهها وتسريحتها "لا تمت للأم الطبيعية بصلة"
لأن الأم مش رح تلبس كعب بالبيت كمان وهي بتغير للبيبي !!!!
لكن خلص العقل الباطن للمشاهد لقطها وخزنها..
بعدين عالدعاية اللي بعدها عطول.. حبيبة الشعب fair & lovely لتبييض البشرة ، وانت احلى لما تكوني بيضا.. 3 اسابيع بس و بتبطلي سمرا، ويع شو سمرا ما سمرا.. ويلا يا عقل باطن خزن لتخزن..
وبعدين بتبدا دعاية شي بنك ولا مؤتمر وبتطلع المرأة الريادية الطموحة التي بتعمل من اجل مستقبل افضل.. وخزن يا عقلي انه "يا هيك الفهمانات يا بلا"
وبعدين يلا نروح ومن غير خجل ع دعاية L'Oréal
انه ييييييي شو بشعة لو فيه بوجهك تجعيدة وحدة..
او لو كانو عيونك دبلانين و مبين انك تعبانة !!
صبية عمرها 15 بتعمل دعايات لكريمات لنساء عمرهم 50 واطلعي، ويا ستي اقولك؟ 40 واطلعي..
وخزن يا عقلي الباطن انه الانثى اللي بوجهها تجاعيد انسانة مو حلوة.. وعأقل وصف (ما تتركي الزمن يبين على ملامحك .. كوني ئد التحدي مع لوريال، سئي=ثقي بلوريال)..
و هلأ دور انثى ديتول اللي بتعقم وعندها وقت تعقم كبسات الضو كل يوم بديتول وتراقب 4 اولاد.. وعادي الحياة كتير بسيطة و حلوة !!
لحد ما نوصل لبرنامج (Joelle)
اللي بتحكي بكل قرف عن موضوع "ليكي كيف جسمك خرب بعد الولادة وصار منظرك بده تزبيط ومنخاارك منحرف 2 ملليمتر لفوق، وسنك التالت من ورا مخربلك اللوك، صح مو مبين بس لازم نغيرلك منظرك ونخلعلك كل سنانك و و نزرعلك بدل منن سنان حلوي و بيضا او اقلا شي تعملي veneers لحتى يكون عندك Hollywood smile
وشعرك (كمان بيقرف) وقع من الولادة، صار لازم نركبلك hair extension لنخفي هالعيوب اللي صارتلك لأنك أم"
كلها ايحاءات للعقل الباطن بتشل تفكيره وبتخليه يكره هالشي وينفر منه ويخاف.. يمكن هاي ربع ساعة من حياة اي حدا فينا مع اي قناة من هالقنوات، لكن هالربع ساعة قدرت تغير مفهوم كل شي طبيعي بحياتنا..
الرضى بالمظاهر، بالاشكال و بالناس متل ما هيه !!
لازم كل حدا يفهم انه الانثى ما فيها تكون "كل ما ذكر سابقا" بهالجودة الألمانية هاي.. لأنها ببساطة بشر !!
رح تنصح لو اكلت شوكولاتة..وما بتقدر تطبخ كل يوم، و رح تتجعد ملامحها لما تسهر عالاولاد سنة بعد سنة..
ورح يخف شعرها لما اطفالها ياخدوا من دمها و من عضمها و يتغير شكل احسن شي فيها لوقت ما يكبروا..
رح تنضغط لو اشتغلت، و رح تقصر بأشياء على حساب أشياء تانية، بس ما فيها تسيطر متل هالمخلوقة ال super اللي بنشوفها بالتلفزيون..
صورة الانثى التركية الخرافية الجمال، و الانثى العاملة، و الام الطباخة والموظفة والمهتمة كتير باللوك تبعها ومكياجها 24 ساعة عوجهها واولادها كلهم مهندسين ودكاترة بنفس الوقت..عم تدبح هالجيل..
عم تاخد منه كل مقاييس الرضى عم تخرّب بيوت..
لانه ما عم يقتنع بأي شي وبقارن وبقارن..
كتب هالمقال..
بالتزامن مع استفسار امرأة "صارلها متزوجة 13 سنة" عن فتوى بتسمحلها انها تعمل عملية بوجهها.. الجميل.. او عالأقل طبيعي "بطلب من زوجها" بس انه مشان تصير تشبه مدري مين..
نسي الافندي تعبها واطفالهم ال 4 وبده اياها تشيل التجاعيد
اللي اصلا ما شافتهم الا ع لىوقته و معه..
نفسي احكي لستي..
يلي هي وجدي عمروا بيت عمره اكتر من 50 سنة و ربوا اكتر من 10 اولاد..
عمره جدي طلب منك يا ستي هوليوود سمايل؟
ولا يا ستي هالوجه الطاهر لما تعبى تجاعيد لتكبروهم وتعلموهم صار بعيون جدي بشع و نفر منك بدل ما يبوسك عجبينك لانك حبيبته مرته و ام اولاده؟
الحب مو اللي بيطلع بمسلسل العشق الأسود..
الحب، هو اللي عمّر بيوت اهالينا..
بلا ولا مقارنة وبكل رضى..
بلا كل هالهبل.

» من أنا ؟ من أكون ؟ لمى الزعبي
» هل عرفت من أكون ؟ / قناديل
» قد أكون أبالغ - سعدية بن دحمان