دموع الورد شعر/جيهان النجار

دموع الورد
شعر/جيهان النجار
============
دموع الورد
عصارة روحه ، وشعوره
قطفتو الورد ..
دبل عوده
بقي محني
بكى الورد اللى
كان دايما
صالب طوله
وسر سعادته
وندوره
عصرتو الورد ..
نزف روحه
عشان تهدو حبايبكم بسر حياته وسروره
يا عاصرين الورد
ما تنسوش ..
جمال الورد
فى حدايقه
فى حضن
فروعه وجدوره
بلاش يتعبى
فى مصانع
ياخدو خلاصته وعطوره ، ما يدوله
تطير فى هوا خالي
ملوش فى الورد وهطوله
عصارة الورد روح غالية
ماهيش لحظات
تعدي أريجه ف مروره
يا عاصرين الورد خدو بالكم
جمال المعنى
ف مضمونه
دموع الورد نزف آهات
على جبينه
أمرتوا تروس
تعصر روحه
بأنينه
كان العهد .. تضمو وده وتصونه
فرح بنعمته .. وخيره
رجعتو فى عهدكم
لما عاهدتو غيره على عصره
وتدميره

» لسه في خاطر - جيهان النجار
» مصور وكاميرا - جيهان النجار
» قصيدة بدون عنوان بقلم جيهان النجار