خيال - البريق السحري - بقلم سناء ام علوش

خياااال...
البريق السحري
سناء ام علوش

من شي اسبوع كنت قاعدة عالبرندا عم وتس مع اختي..قام اجا بياع النايلو المنيو نحاس خبز يابس... زتبت الهاتف من ايدي ورحت لتحت الدرج..
في شوية غراض مكسرة ونايلو قلت لحالي لبيعهن واخلص من هالكركبة..
لبين مالميتن وطلعت كان طرطيرة البياع سبقتني..اشرتلو ماشافني، لفيت بدي ارجع مدري بايش تشركلت، الله ستر ماوقعت..
اتطلعت عالارض وان شي متل بريق الشاي مصدي وعايف حالو.
شلت هالبريق مع دراديعي ورجعت زتيتن تحت الدرج بس حملت هالبريق وقعدت عالدرجة وصرت اتفحصو..
بريق شاي زلومتو طويلة وايدو عجنب ومطعوج ومسكر ماحسنت افتحو..
قمت تذكرت قصة مصباح علاء الدين..ابتسمت وصرت امزح مع حالي وفركت البريق..
وفجأة مابتصدقو اش صار..
ياالله..طلع دخاااان وشحوار من الزلومة..زتيت البريق من ايدي وانا عم طلع مو مصدقة يلي عم بيصير معي..
العمش تشكل من الدخان امرأة سوداااا غطس وخشنة انفها قد الجبسة وتمها شي نص متر..
انا بيني وبين حالي انبسطت..شو بدي بشكلا المهم صار عندي مارد ورح اطلب واتمنى..
وبكل فرح وثقة قلتلا: "بدي هيك وبدي هيك وبدي...." عديت شي مية شغلة مصاري ودهب وبيت وسيارة واربطعش ونص و... وهي واقفة عم تزورني.. قلتلها :"انا مولاتك شو ماسمعتي وليك"
انا خلصت هالجملة ويالطييييف..انبحتت عليي وبلشت سب وبهدلة..الله وكيلكن جررررررصة..
ياامي عهالعلقة..
العمى مين انتي..هيك سألتها..
خبرتني انها مرت مدري ارملة المارد..وانو هي وجوزها كانو ساكنين بفانوس حلو وبيجنن..بس وقع هالفانوس بيد واحد ادلبي من اكتر من خمس سنين..وبلشان الادلبي طلبات شي جرة غاز..وشي سلة معونة..وشي تنكة سمنة..وشي زيت لكا حتى شنكليش طلب منو..وضل يدورلو عالشنكليش سبع شهور وفتل كل ريف ادلب مالقى..
قال جوزها قلو يغير الطلب لان مالقالو شنكليش..
بس الاخ عنّد وقلو جبلي من حماة..المارد ترجاه بس الاخ متنح
اضطر المارد يبيع بيتو الفانوس لمارد تاني..لان الروحة عحماة بدها فت فلوس..خاصة ليلي متل المارد هويتو من عالم الجن ..بدو يفت عالحواجز والشبيحة ليوصل..وقال المارد لمرتو تستناه بشي قرنة ليرجع وبستأجرلا فانوس..وتيسر المارد
ولهلق مابينلو اثر..
ولما المخلوقة طالت سفرة جوزا صارت تتنقل من علبة سمن فاضي لعلبة حلاوة خلصانة او قنية شامبو..
هييييك لحد ما لقت هالبريق الجربان وسكنت فيه، كان هالبريق مشلوف حد خرابة ومحد منتبهلو للقاه راعي كان سارح بغنماتو
اخد البريق وباعو لبياع النايلو بخمسطعش ليرة..
ووقع عالبريق من الطرطيرة وانا لقيتو..
وصارت المخلوقة تتخلقن عليي وتدعي عالراعي وشالت البريق لفوق راسها وسفقتو بالارض جابت اجلو عالخالص..
هون انهارت وصارت تبكي انو وين بدها تروح..
الحقيقة مو مدح بحالي بس انا قلبي كتييييير طيب وحنون.
قمت انتخيت وقلتلها: "له يااختي ام جني بتسكني عندي ليجي جوزك بالسلامة"
اي وهيك صار ..بس الاخت انفردت عالاخير، بتفيق بنص الليل بتقرقع بالمطبخ..بتفوت ببريق وبتطلع من التاني..ومن الفجر بتفيقني لاعملها متة الاخت صاحبة مراق..
وبعد المتة بدها تفطر مابدها غير فلافل ومسبحة وخضرة..لاء وبتحب البندورة يلي صار سعرها واوا..
وكمان نضايفة كل يوم بدي شغللها الببور لتتحمم وتغسل غراضها..
وانا عطيت كلمة مافيني اتراجع..
وعبقول لحالي خطي ماالها حدا وكللللو اجر وثواب الي..
ومتحملة ومو مفرجيتها اي انزعاج..
بس انو آخر شي تجي وتقلي انها متأكدة انو جوزها قتلو الشبيحة..وانها مابيصير تقعد ببيت فيه رجّال غريب"قصدا جوزي"
وقال لازم جوزي يكتب كتابو عليها مشان الحلال والحرام وشرع الله..ومشان حكي الناس والجان..اي هيييييك تخنت كتيييييير

شو رأيكن اعمل انصحوني..مابدي اعجابات بس..علقو وساعدوني
يلي بدو يتمسخر لا يعلق
Sanaa

» القداحة العجيبة - بقلم سناء ام علوش
» قصاصة سرية من دفتر يوميات امرأة مطلقة - بقلم سناء جعفر
» قصاصات سرية (اعترفات نسائية جريئة) الرجال يمتنعون - بقلم سناء جعفر