القداحة العجيبة - بقلم سناء ام علوش

كيفكن فيّا...القداحة العجيبة
هادا ياسادة اليوم الصبح اجت لعندي ام مرعي، هي شافت ابوعلي نزل من هون وهي كانت عم تدق الباب..
الحقيقة انا دوبني مشيت جوزي..والولاد لسا نايمين..
كنت حابة اقعد عالفيس شوي لبين مايفيقو ولادي..
المهم، فتحت لام مرعي ورحبت واهلت وسهلت وفرت ابتسامتي عالآخر..
هاي المخلوقة بالذات بخاف من جيتها، بتم عم تتطلع حواليها
وعيونها رايحة هيك وهيك عم تدور عشي مشان تطلع تسولف..
بس مابيطلعلها. .
قعدنا عالبرندة وسويت ابريق هالمتة وحطيت صحن هالبتفور
وصرت ابتسم وعلى ليش ماعبتجي ومية السلامة واحلى صباحك ياجارة الرضا..
هي كانت مبسوطة ومروقة وآثار آخر قتلة من قتلات ابومرعي مو مبينة..
وبلشت وانا مو نسيانة كيف ضليت متزاعلة مع جوزي من تحت راسهن..من يوم سالفة الجظ مظ بسكر يلي ماالها اصل..
والحكي بيناتنا قلبي مليان منها..
وصارت تقلي وهي عم تتطعوج انو جوزها بعد هديك القتلة عطاها مية دولار تتشبرق فيهن مشان ترضى..
وعملتلي ابومرعي روميو وهي جوليت..
بس على مييين؟!
انا كاشفة الكل وبسمع جوزها كيف بيتغزل فيها بألفاظ المسبات والبهاديل..
عملت حالي مصدقتها..اشو بدي فيها..
تسطفل لان عاهدت حالي مابقا اتدخل بمشاكلهن مشان ماجيب عفاريتن عبيتي..
وام مرعي صارت تبيض بيض حباري.. على قلي هيك وجبلي هيك وعطاني هيك..
وانا سايرها وقلها ماشا الله جارنا ابومرعي حباب وكريم وكسيب..
قلت خليها تصدق حالها وتفل..العمى بقلبها كرعت تلات برقان متة وماخلصت سوالف..
انا والله ماني بالمتة صحة وهنا، الضيف ضيف الله واكرامو واجب..
قامت المنحوسة صارت تقارن جوزها بأبوعلي..ايوا. كللللو الا ابوعلي..
شو جاب (...) لسبحان الله..
اي جوزها لما بيجي عالحارة بدو يفوت غبيتو انا من موقعي بخاف..
وخاصة لما بيجعر بصوتو يلي اصعب من الارتجاجي..
وشكلو لحالو مصيبة..ياربي مو تعيب عخلقة الله بس لوضح الصورة..طووووول بعضلات وكرش..وراسو قد طشت الغسيل واصلع..قال وعامل حالو ابوعنتر ومربي شوارب متل شوارب غسان مكانسي وكل نهارو بيكنفش وبيلحمس عهالشوارب..
كأنهن العلم الوطني الو..
انا وصفناني بكلام ام مرعي وعم اتخيل الفوارق المليون بين ابومرعي وابوعلي الله يخليلنا ياه..
قامت الاخت دبت قنبلة من العيار التقيل..قالتلي ولي عجوزك نفسية كيف متحملتيه..هوووووون انا خلص شاشت معي
وقررت استعمل مكر الانثى ودهائي الخاص وعلمها درس عالعمر..
قلتلها انو ابوعلي مافي منو وهي بتعرف هالشي..وصرت احكيلها امجادخيالية بس ليغظها..
قامت ضحكت ضحكة بتجلط..وقالت حاااااج امس كان عبيحكي عليكي عالسكر والجظ مظ..وكملت وسألتني انوووقت يلي انا قاال مخربطة وحاطة سكر بدال الملح..قال انوعجب ابوعلي ماقتلني..كنت بدي قلها انو القتل بس للحمير واضربها بسمار..
بس خطرتلي خطة خرندعية..
قلتلها بضحكة حفيفة هاد سر.. وجن جنونها المخلوقة لقلها
وانا عم قلها..هأ ..ومابحسن..
وهي تتحزر.شي تقلي سحر وشي تقلي عاملتيلو عملةشي..وشي تسألني اذا انا شايلة حجاب..
الحقيقة اناكل هالقصص مابتدخل مخي ولا بقنع فيها، وبعرف انو مابيضر وبينفع غير الله، وانو هالشغلات شرك والعياذ بالله.
بس نويت انتقم واعمل فيها مقلب وخلي صياحهايوصل للفطيرة
قلتلها الحكي بيني وبينك ياجارة. عندي شغلةومن عند شيخ سرو باتع..سألتي طبعا بألحاح وترجي وبدها تبوس ايدي..
قمت قلتلها انوالشيخ ابوشلتوت المغربي(طبعا هاد اسم خيالي) قلتلها انوقاريلي عقداحة عجيبة ومعبيها غاز سحري..
وانو انا بشغل لجوزي فيها سيكارة هي وبتمو من قداحتي بيكون بيصر مافي منو..ولو حطيت دوا غسيل عالشاي مابيحكي ولا بيعصب..
رجعت تترجا بدها القداحة بس تجربها اليوم..
وشو مابدي بتعطيني..
اعوذ بالله ياام مرعي بس حلفتها ماتحكي لحدا عهالسر..
ورحت عقداحة المطبخ الجديدة..وقويتها عالآخر وابسمت ابتسامة شريرة وعطيتها القداحة..وقلتلها انوةمابيصير تقدح ولا قدحة غير عسكارة ابو مرعي هي وبتمو واكدت عليها السكارةلازم تكون بتمو هه وانتي بيدك تشعليلو ياها..
اخدت القداحة وراحت تفيق جوزها لان صار الضحى وعندو روحةوعكفرنبل..
قلبي معك ياجارتي..هه هه هه..
وبعد شي نص ساعة اشتغلت المسبات من العيار التقيل..وصوت تطبيش مو بالعقل.
ابو مرعي يصول وبجول متل التور الاسباني ويطبش ام مرعي بكل شي وبتطالو ايدو وهي تصرخ وتولول وانا عبسمع..بعدين خفي حس ام مرعي ..العمى كنو البغل موتها..
ياربي دخيلك مابدي هيك..بس بدي رصها شوي بس مو موت..
دبيت الصوت عالجيران وفاتووعبيت ابومرعي وفتت انا وراهن..
منظر يالطيف..ام مرعي مشلوحة بالارض..مالها شعروشعرها معبي ارجاء الدار كلها..الدم عالحيطان وباالاراضي..فاتحة تمها وعم يطلع الزبد ومو مبين ولا سن. بواجهتا..تشويه تام..الجيران شالو المرة ليسعفوها لان لسا فيها روح..
تطلعت عابومرعي بدي قلو انو عيب عليه يقتلها هيك..
الله اكبرعهالمنظر. شوارب ابومرعي محروقات عالاخر..
متل السيفة العتيقة يلي منجلي فيها الصوبا او الببور..
اهههههههاهه..العمش كني القداحة العجيبة آخد مفعولها منيح رجعت عبيتي وعملت حالي مالي خبر..

المهم ابومرعي ماعاد طلع من البيت وام مرعي بأحد مشافي تركيا بالعناية المشددة عم تصارع الموت...

من خيالي وبقلمي سناءالعلي

» خيال - البريق السحري - بقلم سناء ام علوش
» قصاصة سرية من دفتر يوميات امرأة مطلقة - بقلم سناء جعفر
» قصاصات سرية (اعترفات نسائية جريئة) الرجال يمتنعون - بقلم سناء جعفر